പാറശ്ശാല : ആശുപത്രിക്കവല മുതൽ ചെറുവാരക്കോണം വരെ റോഡിന് ഇരുവശവും അനധികൃത പാർക്കിങ് ഗതാഗതക്കുരുക്കിന് കാരണമാകുന്നു. ആശുപത്രിക്കവല മുതൽ മഹാദേവർക്ഷേത്രം വരെയുള്ള പ്രദേശത്താണ് ഗതാഗതക്കുരുക്ക് രൂക്ഷമായിട്ടുള്ളത്. റോഡിന് വീതി കുറവായ ഈ മേഖലയിൽ സ്വകാര്യ പ്രാക്ടീസ് നടത്തുന്ന ഡോക്ടർമാരുടെ വീടുകളിൽ രോഗികളെത്തുന്ന വാഹനങ്ങളും വ്യാപാര സ്ഥാപനങ്ങളിൽ എത്തുന്ന വാഹനങ്ങളുമാണ് പാർക്ക് ചെയ്യുന്നത്. വീതികുറഞ്ഞ ഈ റോഡിൽ ഇരുവശത്തുനിന്നും വലിയ വാഹനങ്ങളെത്തിയാൽ ഏറെ ബുദ്ധിമുട്ടിയാണ് കടന്നുപോകുന്നത്. വലിയ ഗതാഗതക്കുരുക്കാണ് പലപ്പോഴും അനുഭവപ്പെടുന്നത്.
രോഗികൾ ഏറെയെത്തുന്ന വൈകുന്നേരങ്ങളിൽ പലപ്പോഴും ഗതാഗതക്കുരുക്ക് ആശുപത്രിക്കവലയും താണ്ടി കരമന കളിയിക്കാവിള പാതയിലുമെത്തുന്നുണ്ട്. കാരോട് മുക്കോല ബൈപ്പാസ് വഴി എത്തുന്ന വലിയ ടിപ്പർ ലോറികളും ഈ പാതയിൽ എത്തുന്നതോടെ കുരുക്ക് രൂക്ഷമാകും.
അനധികൃതമായി പാർക്ക് ചെയ്തിരിക്കുന്ന വാഹനങ്ങൾ മാറ്റുവാൻ പ്രദേശവാസികൾ ആവശ്യപ്പെട്ടാൽപോലും ഫലമില്ല. ഇത് പലപ്പോഴും വാക്കേറ്റങ്ങൾക്കു കാരണമാകുന്നുണ്ട്.
പാറശ്ശാല ടൗൺ മേഖലയെ പൂർണമായും വലിയ ഗതാഗതക്കുരുക്കിലാക്കുന്ന ഇത്തരം അനധികൃത പാർക്കിങ്ങിനെതിരേ നടപടി സ്വീകരിക്കണമെന്ന ആവശ്യം ശക്തമാണ്.
