ഇൻഫോപാർക്ക് മൂന്നാം ഘട്ടം വരുന്നു ഉയരുക എ ഐ നിയന്ത്രിത ടൗൺഷിപ്പ്

ഇൻഫോപാർക്ക്‌ മൂന്നാംഘട്ടം നടപ്പാക്കുന്നതിന്‌ അനുമതി നൽകി സർക്കാരിൻ്റെ ഉത്തരവ്‌.

കേരളത്തിൻ്റെ വികസനഗാഥയിൽ തിളക്കമേറിയ മറ്റൊരു അധ്യായം കൂട്ടിച്ചേർത്തുകൊണ്ട് കൊച്ചിയിലെ ഇൻഫോപാർക്കിന്റെ മൂന്നാം ഘട്ടം യാഥാർഥ്യമാവുകയാണെന്ന് മുഖ്യമന്ത്രി പിണറായി വിജയൻ പറഞ്ഞു.

വരുംകാലത്തിൻ്റെ ആവശ്യതകൾ മുന്നിൽ കണ്ടുകൊണ്ട് എഐ സാങ്കേതിക വിദ്യ നിയന്ത്രിത ടൗൺഷിപ്പാണ് ഇൻഫോപാർക്കിൽ വിഭാവനം ചെയ്തിരിക്കുന്നതെന്നും അദ്ദേഹം വ്യക്തമാക്കി.

300 ഏക്കർ വിസ്തൃതിയിൽ 20 മില്യൺ സ്‌ക്വയർ ഫീറ്റ് ഐടി സ്പെയ്‌സോടെ നിലവിൽ വരുന്ന ഫേസ് 3 ടൗൺഷിപ്പിൽ താമസ സ്ഥലങ്ങളും വിദ്യാഭ്യാസ സ്ഥാപനങ്ങളും ആരോഗ്യ സ്ഥാപനങ്ങളുമടക്കം ഉണ്ടായിരിക്കും.

മാലിന്യ സംസ്കരണത്തിനും ഇവിടെ അത്യാധുനിക സൗകര്യങ്ങൾ ഒരുക്കുന്നതാണ്.

ഗ്രെയ്റ്റർ കൊച്ചിൻ ഡെവലപ്മെൻ്റ് അതോറിറ്റി (ജിസിഡിഎ) യുടെ നേതൃത്വത്തിൽ ലാൻഡ് പൂളിങ് മാതൃകയിലാണ് ഭൂമി ഏറ്റെടുത്ത് പദ്ധതി യാഥാർഥ്യമാക്കാൻ ഉദ്ദേശിക്കുന്നത്.

2 ലക്ഷത്തോളം പേർക്ക് തൊഴിലവസരങ്ങൾ സൃഷ്ടിക്കാനും ഇൻഫോപാർക്ക് ഫേസ് 3 യിലൂടെ സാധിക്കുമെന്നാണ് കരുതുന്നത്.

ഇൻഫോപാർക്ക് ഫേസ് 4ൻ്റെ ഭൂമിയേറ്റെടുക്കലിനായുള്ള നടപടികളും പുരോഗമിക്കുകയാണ്.

ഈ രണ്ട് ഫേസുകളും യാഥാർഥ്യമാവുന്നതോടെ ലോകം തന്നെ ഉറ്റുനോക്കുന്ന ഐടി ഹബ്ബായി കൊച്ചി മാറും.

ധാരണപത്രത്തിൽ ഇൻഫോപാർക്കും ജിസിഡിഎയും 29ന്‌ മുഖ്യമന്ത്രി പിണറായി വിജയന്റെ സാന്നിധ്യത്തിൽ ഒപ്പുവയ്‌ക്കും.

ലാൻഡ് പൂളിങ്ങ് മാതൃകയിൽ യാഥാർഥ്യമാക്കാൻ ശ്രമിക്കുന്ന ഫേസ് 3 ക്ക് ഒപ്പം തന്നെ ഫേസ് 4 ഭൂമി ഏറ്റെടുക്കുന്നതിനുള്ള നടപടികളും പുരോഗമിക്കുന്നുണ്ടെന്ന് വ്യവസായ മന്ത്രി പി രാജീവും പറഞ്ഞു.

ഇൻഫോപാർക്ക് മൂന്നാം ഘട്ടം യാഥാർഥ്യമാകുമ്പോൾ രണ്ടുലക്ഷത്തോളം പേർക്ക് തൊഴിലവസരമുണ്ടാകും.

കുന്നത്തുനാട്‌, കിഴക്കമ്പലം വില്ലേജുകളിലായാണ്‌ പദ്ധതിപ്രദേശം.

കൊച്ചി നഗരം, ദേശീയപാത, റെയിൽവേ, വിമാനത്താവളം എന്നിവിടങ്ങളിലേക്ക്‌ അനായാസം എത്താനുള്ള ഗതാഗത സ‍ൗകര്യങ്ങളും ഉറപ്പാക്കും.

ഇൻഫോപാർക്കിൻ്റെയും ജിസിഡിഎയുടെയും ഉത്തരവാദിത്വങ്ങൾ വിശദമാക്കിയാണ്‌ സർക്കാർ ഉത്തരവ്‌.

സാധ്യതാപഠനം, സ്ഥലം കണ്ടെത്തൽ, സ്ഥലമുടമകളോട്‌ പദ്ധതി വിശദീകരിക്കൽ – ചർച്ചകൾ, സ്ഥലമുടമകളുടെ സമ്മതംനേടൽ, സർവേകൾ, ലാൻഡ്‌ പൂളിങ്ങിനുള്ള വിശദപദ്ധതി റിപ്പോർട്ട്‌ തയ്യാറാക്കൽ, ആസൂത്രണ മേൽനോട്ടം, റോഡ്‌ ഉൾപ്പെടെയുള്ള അടിസ്ഥാന സ‍ൗകര്യങ്ങളുടെ വികസനം, ഭൂമിയുടെ വികസനം, വികസിപ്പിച്ച ഭൂമിയുടെ നിശ്ചിതഭാഗം ഉടമയ്‌ക്ക്‌ പുനർവിതരണം ചെയ്യൽ തുടങ്ങിയ ചുമതലകൾ ജിസിഡിഎ വഹിക്കും.

ഫണ്ട്‌ ഇൻഫോപാർക്ക്‌ നൽകണം.