തിരുവനന്തപുരം: സിറ്റി പൊലീസ് നടത്തിയ വ്യാപക തെരച്ചിലിൽ നഗരത്തിലെ വിവിധ ഭാഗങ്ങളിൽ നിന്ന് സ്ഥിരംകുറ്റവാളികളായ 82 പേരെ കസ്റ്റഡിയിലെടുത്തു. റൗഡി ലിസ്റ്റിൽ ഉൾപ്പെട്ടതും പ്രധാനികളുമായ ക്രിമിനലുകളെ കേന്ദ്രീകരിച്ചുള്ള പരിശോധനയിൽ ഓംപ്രകാശ് അടക്കമുള്ളവർ പിടിയിലായി. നിയമസഭ തിരഞ്ഞെടുപ്പ്,ഉത്സവങ്ങൾ എന്നിവ കണക്കിലെടുത്താണ് നഗരത്തിലെ പൊലീസ് സ്റ്റേഷൻ പരിധികളിൽ കമ്മിഷണർ കെ.കാർത്തികിന്റെ നിർദ്ദേശപ്രകാരം പരിശോധന നടന്നത്. വലിയതുറ സ്റ്റേഷനിൽ പരിധിയിൽ നിന്ന് ഓംപ്രകാശ്,പൊക്കം ഷാജഹാൻ എന്ന ഷാജഹാൻ,എയർപോർട്ട് ഡാനി എന്ന സ്റ്റെഫാൻ,പേരൂർക്കട സ്റ്റേഷനിൽ പരിധിയിൽ നിന്ന് അനന്ദു,ആദിത്യൻ എന്ന ഉണ്ണിക്കുട്ടൻ,പടക്കി സാബു എന്ന ബിജു കുമാർ,പ്രഫുൽ രാജ്, പാരാട്ടം വിഷ്ണു എന്ന വിഷ്ണു,അരിപ്പൊടി രാജേഷ് എന്ന രാജേഷ്,വട്ടിയൂർക്കാവ് പൊലീസ് സ്റ്റേഷൻ പരിധിയിൽ നിന്ന് സായ് കൃഷ്ണ,തുമ്പ സ്റ്റേഷൻ പരിധിയിൽ നിന്ന് നികേഷ് ലാൽ,ബിനോയി,ജിതിൻ,ജിഷ്ണു, കഴക്കൂട്ടത്തുനിന്ന് അഭിലാഷ്,സംഗീത്,വഞ്ചിയുർ സ്റ്റേഷൻ പരിധിയിൽ നിന്ന് ശംഭുദേവ് എന്നിവർ പിടിയിലായവരിൽപ്പെടുന്നു.
ബസ് സ്റ്റാൻഡ്,റെയിൽവേ സ്റ്റേഷൻ പരിസരം,ലോഡ്ജുകൾ,തീരദേശ മേഖലകൾ,കോളനികൾ ബാറുകൾ എന്നിവിടങ്ങളിൽ പൊലീസ് നിരീക്ഷണം,പ്രത്യേക റെയ്ഡുകൾ,പരിശോധനകൾ എന്നിവ ശക്തമാക്കിയതായി കമ്മിഷണർ അറിയിച്ചു.
