ബെംഗളൂരു: ഐടി നഗരമായ ബെംഗളൂരുവിൻ്റെ സ്വപ്ന പദ്ധതികളിലൊന്നാണ് ബെംഗളൂരു ബിസിനസ് കോറിഡോർ ( പെരിഫറൽ റിങ് റോഡ് ). നഗരത്തിലെയും നഗരത്തിലേക്കുമുള്ള ഗതാഗതം സുഗമമാക്കുകയും ഗതാഗതക്കുരുക്ക് ഒഴിവാക്കുകയുമാണ് പദ്ധതികൊണ്ട് സംസ്ഥാന സർക്കാർ ലക്ഷ്യമിടുന്നത്. പദ്ധതിയുമായി സർക്കാർ അതിവേഗത്തിൽ മുന്നോട്ട് പോകുകയാണ്. മുൻപ് പെരിഫറൽ റിങ് റോഡ് എന്നറിയപ്പെട്ടിരുന്ന പദ്ധതി ബെംഗളൂരുവിലുടനീളം കിഴക്ക് – പടിഞ്ഞാറ്, വടക്ക് – തെക്ക് കണക്റ്റിവിറ്റി മെച്ചപ്പെടുത്തുന്നതിനൊപ്പം പ്രധാന റോഡുകളിലെ തിരക്ക് കുറയ്ക്കുകയും ചെയ്യും.
ബാംഗ്ലൂർ ഡെവലപ്മെന്റ് അതോറിറ്റി (ബിഡിഎ) ബെംഗളൂരു ബിസിനസ് കോറിഡോർ പദ്ധതിയുടെ തുടർ നടപടികളിലേക്ക് കടന്നു. ഒന്നിലധികം പാക്കേജുകളായി വിഭജിച്ച് ഭൂമി ഏറ്റെടുക്കുകയാണ്. തുമകുരു റോഡ് – ബല്ലാരി റോഡ് സ്ട്രെച്ചിനുള്ള ഭൂമി ഏറ്റെടുക്കൽ വേഗത്തിലാക്കും. മാർച്ചിൽ ഈ 23 കിലോമീറ്റർ ദൈർഘ്യമുള്ള ടെൻഡറുകൾ നൽകാനുള്ള ഒരുക്കങ്ങൾ നടന്നുവരികയാണ്.
മഡവരയിലെ ബാംഗ്ലൂർ ഇന്റർനാഷണൽ എക്സിബിഷൻ സെന്ററിൽ (ബിഐഇസി) നിന്ന് റോഡ് ആരംഭിച്ച് വെങ്കടാലയിലെ കോളിൻസ് എയ്റോസ്പേസ് പാർക്കിന് അടുത്തായി ബല്ലാരി റോഡിന് കുറുകെ കടന്നുപോകും. ഇവിടെ പുതിയ എയർപോർട്ട് മെട്രോ ലൈനിൽ ഒരു മെട്രോ സ്റ്റേഷൻ വരും. വിമാനത്താവള റോഡ്, തുമകുരു റോഡ്, ഹെബ്ബാൾ ജങ്ഷൻ, തുമകുരു റോഡ്, ബല്ലാരി റോഡ് എന്നിവയെ ബന്ധിപ്പിക്കും. തുമകുരു റോഡ് – ബല്ലാരി റോഡ് പാതയിലെ 308 ഏക്കർ ഭൂമി ബിഡിഎ ഏറ്റെടുത്തുകഴിഞ്ഞു. ഇതിൽ സർക്കാർ ഉടമസ്ഥതയിലുള്ള ഭൂമിയും ഉൾപ്പെടുന്നു. ഇതോടെ പദ്ധതിക്ക് ആവശ്യമുള്ള ഭൂമിയുടെ 50 ശതമാനത്തോളമുണ്ട്.
പാക്കേജ് തിരിച്ചുള്ള ടെൻഡറുകൾ നൽകുമെന്നും ഓരോ പാതയ്ക്കും 80% ഭൂമി ലഭിച്ചുകഴിഞ്ഞാൽ നിർമാണ പ്രവർത്തനങ്ങൾ ആരംഭിക്കുമെന്നും ബിബിസി ലിമിറ്റഡ് ചെയർമാൻ എൽകെ അതീഖ് പറഞ്ഞു. ഭൂമി ഏറ്റെടുക്കൽ 50 ശതമാനം കടന്നതോടെയാണ് ഗതാഗതക്കുരുക്ക് ലഘൂകരിക്കുന്നതിനായി ഘട്ടം ഘട്ടമായുള്ള ടെൻഡറുകൾ ബിബിസി ലിമിറ്റഡ് ആസൂത്രണം ചെയ്യുന്നത്.
ബല്ലാരി റോഡിലെ വെങ്കടാലയ്ക്ക് ഏക്കറിന് 15.6 കോടി എന്ന നിരക്കിൽ ഏറ്റവും ഉയർന്ന നഷ്ടപരിഹാരം നൽകുന്നുണ്ട്. 2007ൽ ബിഡിഎ 943 ഏക്കർ ഭൂമിക്ക് അവാർഡുകൾ പാസാക്കിയിരുന്നെങ്കിലും നഷ്ടപരിഹാരം നൽകിയിട്ടില്ല. പദ്ധതിക്കായി ഏറ്റെടുക്കുന്ന ഏതൊരു ഭൂമിക്കും ഏറ്റവും ഉയർന്ന നഷ്ടപരിഹാര പാക്കേജാണ് വിവിധ മേഖലയിൽ വാഗ്ദാനം ചെയ്യുന്നത്. മാർഗനിർദേശ മൂല്യത്തിന്റെ അടിസ്ഥാനത്തിലാണ് നഷ്ടപരിഹാരം നൽകുന്നതെന്ന് വൃത്തങ്ങൾ പറഞ്ഞു.
